ശബ്ദരൂപങ്ങൾ ഇല്ലാത്തവർ

 

FB Post- 5 July, 2015

Link to the post

ഇന്നലെ തൃശ്ശൂരില്‍ നിന്ന് കയറിയ ബസ്സിലായിരുന്നു അവര്‍ ഉണ്ടായിരുന്നത്. മൂന്നു സ്ത്രീകളും രണ്ടു കുട്ടികളും. എന്റെ അടുത്തിരുന്ന മെലിഞ്ഞ പെണ്‍കുട്ടി കൈകളിലൂടെ സംസാരം തുടങ്ങിയപ്പോഴായിരുന്നു ഞാന്‍ ശ്രദ്ധിച്ചത്. ഡ്രൈവറുടെ എതിര്‍വശത്തും പുറകിലും ഉള്ള സീറ്റുകളില്‍ ഇടം പിടിച്ച് അവര്‍ അവരുടെ ലോകം സൃഷ്ടിച്ചിരുന്നു. ശബ്ദരൂപങ്ങള്‍ തീര്‍ത്തും ഇല്ലാത്തവര്‍ ആയിരുന്നോ അതോ മിണ്ടാന്‍ മാത്രം കഴിയാത്തവരായിരുന്നോ എന്നൊന്നും വേര്‍തിരിച്ചറിയാത്ത വിധം അവരുടെ ലോകം ഒന്നായിരുന്നു. കാണുന്ന കാഴ്ചകളെല്ലാം കൈവിരലുകളിലെ ചിത്രങ്ങളാക്കി മാറ്റിയിരുന്നു കുട്ടികള്‍.

ബസ്സില്‍ കയറുന്നവരും ഇറങ്ങുന്നവരുമൊന്നും ആ ശബ്ദരഹിതമായ ലോകത്തില്‍ തടസ്സങ്ങള്‍ ഉണ്ടാക്കിയില്ല. കൌതുകത്തോടെയാണ് നിരീക്ഷിക്കാന്‍ തുടങ്ങിയത് എങ്കിലും പതുക്കെ പതുക്കെ ബസ്സിന്റെ ഇരമ്പല്‍, മറ്റു യാത്രക്കാരുടെ ബഹളങ്ങള്‍, തുടങ്ങിയ ശബ്ദങ്ങളെല്ലാം എന്റെ ലോകത്ത് നിന്നും പടിയിറങ്ങി. വല്ലാത്തൊരു ഇഴുകിച്ചേരല്‍ ആയിരുന്നത്, വല്ലാത്തൊരു അനുഭവവും. 

അവരില്‍ ഒരു കുട്ടിയും ഒരമ്മയും കേള്‍ക്കാനും സംസാരിക്കാനും കഴിയുന്നവരായിരുന്നു എന്ന അറിവാണ് എന്നെ അത്ഭുതപ്പെടുത്തിയത്. അത്രയും സമയം അവരും ശബ്ദരൂപങ്ങള്‍ ഇല്ലാത്തവരായിരുന്നല്ലോ !!!